原标题 [“大佬倌”个姚慕双(图)]

余叶文

　　文/邵永平

　　我“吃煞”姚慕双、周柏春，是垃“文革”结束后，有趟陪外婆到上海体育馆看“兄弟档”演出个独脚戏《宁波音乐家》，笑煞也是宁波籍个外婆。伊拉开场白就讲得邪气噱头。姚：党中央粉碎“四人帮”，全国上下欢欣鼓舞。周：阿哥姚慕双深受其害，刺激蛮深。伊关照阿嫂骨灰箱准备好。不过现在迭只小箱子勿派用场了。姚：照样派用场，拨伲家主婆当梳头家生了。

　　姚慕双成名于上个世纪。当时呒没网络、电视，靠唱电台、唱片播放独脚戏，每日夜到头，屋里有无线电个人家侪会静候欣赏。姚慕双成名属于“无心插柳”，当时个姚家本以为儿子只是好白相，垃拉弄堂里学方言、学唱外国歌、模仿小人物腔调，呒没想到有一日原名为姚锡祺个姚家公子会成名，伊到电台模仿唱一首英文歌拨拉何双呆一眼相中，乃末正式下海唱滑稽。屋里拿姚锡麒改成姚慕双，意思是仰慕师父何双呆。一趟为了救场寻来育才中学读书个胞弟姚一龙（周柏春原名）顶替。本来要想隐瞒家人取名周柏荫，临时上场姚慕双误口报新搭档为周柏春，将错就错竟获得空前成功！伊拉两介头个代表作有：《英文翻译》、《各地堂倌》、《宁波音乐家》、《我肯嫁拨伊》等等；兄弟档以“新、奇、乐、雅”之特色，垃当时100多档独脚戏当中脱颖而出独占鳌头。

　　伊拉也是一棵电台招商引资广告“摇钱树”，“老字号”商家广告投放垃姚周黄金时段勿胜枚举。早期，伊拉参演过最早个滑稽戏《瞎子借雨伞》、《小山东到上海》咾啥。解放后，姚周共同组建蜜蜂滑稽剧团，主演《小儿科》、《老账房》、《不夜的村庄》等现代剧目。1960年“姚慕双垃《满园春色》中演4号服务员；《笑着向昨天告别》演华祖康；《出色的答案》演工人老方；改革开放初期在《路灯下的宝贝》中甘当绿叶塑造了一位尽心尽责的中学教师王老师的形象。1985年姚周到香港演出一票难求，据香港名票柏小龙回忆：两张谭咏麟演唱会一等票子刚刚可以调一张姚周领双字辈弟子滑稽专场一般位子个票子。伊还培养了一批具有影响力个“双字辈”学生。姚祺儿经常对同行“打朋”（打趣）讲：“要是去看我爹爹，勿要买啥，只要带几只过冬 、油葫芦伊就焐心了。”伊衣裳里向个袋袋，会有各种小虫个叫声。姚慕双好烟少酒，顶顶中意牡丹牌，平常欢喜看美国电影、爱好养虫，听英文歌曲搭小动物个叫声是伊个一大乐趣！啥人到姚家见老师，至少请侬吃一碗苏州老佣人下个热气腾腾排骨面。像晚辈周立波赛过姚家编外子女，曾一度学垃姚家住垃姚家吃垃姚家，成为姚慕双关心爱护新秀个美谈，垃周立波心目中姚慕双就是自己个亲外公；垃阿拉心目中，姚慕双是个好好“大佬倌”！  (来源：新民晚报)